Kushtetuesja reagon ndaj kritikave të Kurtit: Asnjë individ s’ndërhyn në punën tonë

Gjykata Kushtetuese e Republikës së Kosovës përmes një postimi në Facebook ka shkruar se shpreh shqetësimin e saj lidhur me, siç thuhet në reagim deklarimet e pamatura të zyrtarëve të lartë shtetëror dhe të zgjedhurve politikë.

“Pavarësia e Gjykatës Kushtetuese nuk është privilegj i gjyqtarëve të saj, por është themel i shtetit të së drejtës. Pavarësia dhe paanshmëria e Gjykatës Kushtetuese të Republikës së Kosovës janë të mbrojtura me Kushtetutë, dhe asnjë institucion, parti politike apo individ nuk mund të ndërhyjë në punën e saj. Çdo përpjekje për të ushtruar presion mbi gjyqtarët kushtetues përbën cenim të parimit themelor të ndarjes së pushteteve dhe minon besimin e qytetarëve në sundimin e ligjit dhe në vetë demokracinë”, thuhet në reagim.

Më tej, Kushtetuesja thotë se vendimet e kësaj gjykate bazohen ekskluzivisht në Kushtetutën e Republikës së Kosovës, në praktikën e saj gjyqësore dhe në standardet ndërkombëtare për mbrojtjen e të drejtave dhe lirive themelore të njeriut, shkruan KosovaPress.

“Vendimet e Gjykatës Kushtetuese bazohen ekskluzivisht në Kushtetutën e Republikës së Kosovës, në praktikën e saj gjyqësore, si dhe në standardet ndërkombëtare për mbrojtjen e të drejtave dhe lirive themelore të njeriut. Rrjedhimisht, çdo deklaratë që tenton të relativizojë apo paragjykojë vendimet e Gjykatës Kushtetuese është jo vetëm e papërgjegjshme, por edhe e dëmshme për zhvillimin demokratik të vendit”, thuhet ndër të tjerash.

Një ditë më parë, pasi u rimandatua nga LVV për postin e kryeministrit të Kosovës, Albin Kurti  kritikoi gjatë fjalimit Gjykatën Kushtetuese për vendimet që i ka marrë gjatë mandatit të tij qeverisës, dhe ato të muajve të fundit lidhur me konstituim të Kuvendit.

“Ndërsa Qeveria punon çdo ditë për qytetarët, Gjykata Kushtetuese vazhdon të vonojë vendime jetike, duke bllokuar reforma, duke shkaktuar pasoja të drejtpërdrejta për demokracinë, për qytetarët, për zhvillimin e vendit”, u shpreh Kurti.

LEXONI GJITHASHTU:

• Kurti flet pasi u mandatua nga LVV për kryeministër, kritika të ashpra Kushtetueses
• Vetëvendosje propozon sërish Kurtin për kryeministër