Lagarde: Rrezik për ekonominë e botës nëse Trump merr kontrollin e Rezervës Federale

Presidentja e Bankës Qendrore Evropiane (BQE), Christine Lagarde, paralajmëroi sot se nëse Presidenti i SHBA-së Donald Trump do të merrte kontrollin e Rezervës Federale të SHBA-së (Fed), duke pasur parasysh vendimet dhe deklaratat e tij për ta arritur këtë, “ky do të ishte një rrezik shumë serioz për ekonominë amerikane dhe për ekonominë botërore”.

Në një intervistë me radiostacionin francez “Radio Classique”, ajo deklaroi se marrja e kontrollit “do të jetë e vështirë”, duke pasur parasysh se Gjykata Supreme e SHBA-së ka vendosur që shkarkimi i guvernatorit të Rezervës Federale mund të bëhet vetëm në rast incidentesh serioze.

“Nëse kjo do të ndodhte, do të ishte një rrezik shumë serioz për ekonominë amerikane dhe ekonominë globale, sepse politika monetare e Rezervës Federale ndikon në stabilitetin e çmimeve dhe punësimin, dhe pasojat që do të kishte në të gjithë botën do të ishin shumë shqetësuese”, paralajmëroi Lagarde.

Javën e kaluar, Trump shkarkoi një nga anëtaret e Bordit Federal të Guvernatorëve, Lisa Cook, mes tensioneve midis presidentit amerikan dhe Rezervës Federale, e cila ka ushtruar presion mbi bordin e guvernatorëve për javë të tëra që të ulë normat e interesit, megjithëse zyrtarët ngurrojnë ta bëjnë këtë, duke pasur parasysh rrezikun inflacionist që shohin në rritjen e tarifave.

Kur u pyet nëse besonte se Shtetet e Bashkuara të Amerikës mbeten një vend i qeverisur nga sundimi i ligjit, Lagarde u përgjigj pozitivisht, “me kusht që Gjykata Supreme të respektohet dhe vendimet e saj të respektohen”.

“Nëse ai organ gjyqësor i nënshtrohet presionit, jam shumë e shqetësuar për sundimin e ligjit”, shtoi ajo.

LEXONI GJITHASHTU:

• Trump e shkarkoi si Guvernatore të Rezervës Federale, Lisa Cock e padit
• Trump kërkesë kongresit: Ulni ndihmën ekonomike ndërkombëtare