Lavrov flet për takimin Trump-Putin: Do të flasim qartë, Moska nuk bën hamendësime

Ministri i Jashtëm rus, Sergei Lavrov, deklaroi të premten se Rusia do t’i dërgojë një mesazh të qartë Shteteve të Bashkuara gjatë samitit dypalësh që do të zhvillohet në Alaska mes presidentëve Vladimir Putin dhe Donald Trump.

Duke folur për mediat menjëherë pas mbërritjes në Anchorage, Lavrov theksoi se Moska ka një qëndrim të qartë dhe të argumentuar, të cilin do ta paraqesë në mënyrë të strukturuar gjatë takimit në Bazën e Përbashkët Elmendorf-Richardson.

“Ne kurrë nuk përpiqemi të parashikojmë rezultatin apo të bëjmë hamendësime,” tha Lavrov, duke komentuar edhe mbi deklaratat e Trump se ekziston një mundësi 25% që negociatat të dështojnë. E dimë që kemi argumente dhe një pozicion të kuptueshëm. Do ta paraqesim atë,” shtoi ai.

Samiti në fjalë shënon një moment historik, pasi është hera e parë që një udhëheqës rus viziton Alaskën – dikur territor i Perandorisë Ruse, i cili iu shit SHBA-së në vitin 1867.

Lavrov tha se e kishte vizituar më parë Alaskën, ndërsa nënvizoi rëndësinë e kontakteve paraprake të zhvilluara nga i dërguari amerikan, Steve Witkoff.

“Shpresoj se do ta vazhdojmë këtë bisedë të dobishme,” përfundoi shefi i diplomacisë ruse.

LEXONI GJITHASHTU:

• Pamje/ Lavrov nxit reagime, vesh në Alaskë bluzë me mbishkrimin e Bashkimit Sovjetik
• Putin niset drejt Alaskës për takim me Trumpin, ukrainasit presin të shqetësuar