Librazhd: Kontrolle për parandalimin e gjuetisë, kapen tre persona me armë gjahu

Policia e Librazhdit ka kryer disa kontrolle intensive me qëllim parandalimin e veprimtarisë të paligjshme të gjuetisë në zonat e mbrojtura.

Në fshatin Stërblevë, në rrugën që të çon në Parkun Kombëtar të Shebenikut, shërbimet e Policisë kanë konstatuar 3 persona duke udhëtuar me një automjet tip “Suzuki”, në të cilin, gjatë kontrollit, gjetën 3 armë gjahu me leje dhe 2 gjerdanë me 30 fishekë për armë gjahu, të cilat u sekuestruan në cilësinë e provës materiale.

Si rezultat, janë proceduar penalisht: O. D., 44 vjeç, L. D., 21 vjeç, dhe R. Sh., 21 vjeç, të tre banues në Elbasan, për veprën penale “Dëmtimi i specieve të mbrojtura të florës dhe faunës së egër”, kryer në bashkëpunim, mbetur në tentativë.