Liceu Artistik i Tiranës do të bashkëpunojë me shkollën e Muzikës në Gjilan

Liceu artistik i Tiranës do të bashkëpunojë me shkollën e Muzikës në Gjilan. Për këtë, drejtori komunal i Arsimit në Gjilan, Nazim Gagica ka pritur sot në takim pune delegacionin e Liceut artistik të Tiranës, kryesuar nga drejtori Shkëlqim Sirika.

“Gjilani është krenar që bashkëpunimin e ka prej kohësh në një dimension shumë të gjerë me Liceun Artistik të Tiranës dhe përvojat por edhe bashkëpunimi që është duke ndodhur në këtë fazë është mbresëlënës dhe shumë premtues. Edhe në të ardhmen urat lidhëse do të jenë në kuadër të aktiviteteve të shtuara mes Gjilanit dhe Tiranës”, tha z. Gagica.

Drejtori i Liceut Artistik të Tiranës, Shkëlqim Sirika, tha se nga ajo që ka parë deri tani në Gjilan dhe në shkollën e Muzikës në veçanti, dëshmon për një vendosmëri në zhvillimin e të nxënit dhe krijimit të talenteve.

Nga ana tjetër, drejtori i shkollës së Muzikës në Gjilan, Kushtrim Jakupi, ka konfirmuar se puna në shkollën e muzikës bëhet me profesionalizëm për të zhvilluar talentin e nxënësve në degë të ndryshme të kësaj shkolle.

LEXONI GJITHASHTU:

“Çajupi” rikthehet me këngë, koncerti “Luleborë” bën bashkë soprano Golemin dhe baritonin Zhabjaku