Lufta në Lindjen e Mesme, BE propozon uljen e objektivit të rezervave të gazit

Komisioni Evropian u ka bërë thirrje vendeve anëtare të Bashkimit Evropian që të ulin objektivin për mbushjen e rezervave të gazit natyror, në përpjekje për të lehtësuar presionet në rritje të çmimeve të energjisë.

Nisma vjen në një kohë kur lufta në Lindjen e Mesme ka ndikuar negativisht në furnizimet globale me energji, duke rritur pasigurinë në tregje.

Komisioneri evropian për energjinë, Dan Jorgensen, u ka dërguar një letër vendeve anëtare ku kërkon që të shqyrtohet ulja e objektivit të mbushjes së rezervave në 80%, nga niveli aktual prej 90%.

Sipas tij, një masë e tillë do të ndihmonte në stabilizimin e tregut dhe do të ofronte më shumë siguri për operatorët dhe konsumatorët gjatë sezonit të mbushjes së depozitave të gazit.