‘Luftë’ deri në ditën e fundit, akuza të ashpra mes Trump dhe Harris

Kandidatët për president të Shteteve të Bashkuara, Kamala Harris dhe Donald Trump, po vizitojnë shtetet e lëkundura teksa vazhdojnë të tërheqin votuesit kur ka mbetur më pak se një javë nga zgjedhjet.

Pasi u sfidua nga protestuesit pro-palestinezë në tre nga eventet e saj, Harris u tha votuesve të mërkurën në Uiskonsin se po kërkon gjuhën e përbashkët me personat që nuk bien dakord me të.

“Ndryshe nga Donald Trump, unë nuk besoj se njerëzit që nuk janë dakord me mua janë armiq. Ai do që t’i burgosë ata. Ndërsa unë do t’u ofroj një vend në tryezën time”, deklaroi Harris.

Ndërkohë, Donald Trump ka vijuar të kapet pas komenteve kontradiktore të presidentit Joe Biden, teksa merrte drejtimin e një kamioni mbeturinash kur mbërriti në Gjirin e Gjelbër të Uiskonsinit.

“Joe Biden duhet t’i vijë turp nga vetja nëse është i vetëdijshëm për atë që bën. Ndërsa Harris duhet t’i vijë turp sepse nuk duhet ta lejojë t’i bëjë këto. Ajo është zëvendës presidente, por po vepron si presidente. Ajo nuk duhet ta kishte lejuar kurrë atë. Shpresoj që ta shijoni kamionin e mbeturinave”, theksoi Trump.

Të dy kandidatët bënë një ndalesë elektorale në Karolinën e Veriut më herët gjatë ditës, dhe Harris udhëtoi edhe në Harrisburg të Pensilvanisë, ku u bëri thirrje qytetarëve që t’i hedhin votat në kuti pa u vonuar.