Bilanci i viktimave të një sulmi me dronë natën mes së shtunës dhe së dielës në Odesa është ngjitur në 10, mes të cilëve një foshnje 4-muajshe dhe një fëmijë i mitur.
Në reagimin e tij, presidenti Volodymyr Zelensky u bëri thirrje aleatëve perëndimorë të mos vonojnë në dorëzimin e armatimeve.
“Vonesat në dorëzimin e armatimeve, kryesisht sistemeve ajrore për të mbrojtur popullin tonë, fatkeqësisht çojnë në këto humbje. Ato shtojnë vrasjet e fëmijëve nga Rusia, të cilat janë në rritje”, tha Zelensky në rrjetin social “X”.
Forcat e armatosura ukrainase raportuan sulme të shumta në shkallë vendi dhe njoftuan rrëzimin e 14 nga 17 dronëve të nisur nga Rusia.
Ndërsa Ministria ruse e Mbrojtjes raportoi se 38 dronë ukrainas ishin lokalizuar në orët e para të së dielës mbi gadishullin e Krimesë.
Gjithashtu, zyrtarët rusë bënë të ditur se një dron ukrainas kishte goditur një godinë të banuar në Shën Peterburg, duke shkaktuar dëme materiale.
LEXONI GJITHASHTU:
- Kush janë të burgosurit e tjerë rusë që mund të kenë fatin e Navalnyt?
- Luftë me dronë Ukrainë-Rusi, sulmohen fshatrat në kufirin rus
