Luftimet në Sudan hyjnë në javën e dytë

Luftimet në kryeqytetin e Sudanit kanë hyrë në javën e dytë, teksa është shkelur edhe një armëpushim i përkohshëm. Qindra persona janë vrarë dhe mijëra të tjerë janë plagosur nga luftimet mes forcave të dy gjeneralëve rivalë.

Gjatë natës janë dëgjuar shpërthime të fuqishme në kryeqytetin sudanez, Kartum, ndërsa në mëngjesin e së shtunës janë rikthyer luftimet me armë zjarri.

Dhuna shpërtheu më 15 prill kur nisën luftimet mes forcave besnike të shefit të ushtrisë, Abdel Fattah al-Burhan, dhe zëvendësit të tij, Mohamed Hamdan Daglo, i cili komandon grupin paramilitar të Forcave të Mbështetjes së Shpejtë.

Këta dy ish-aleatë kishin marrë pushtetin përmes një grusht shteti më 2021, por më pas patën mosmarrëveshje për shkak të ndarjes së pushtetit.

Ushtria njoftoi më 21 prill se ishte pajtuar “për një armëpushim treditor” gjatë festës së Fitër Bajramit që shënon përfundimin e Muajit të shenjtë të Ramazanit.

Armëpushimi ishte kërkuar një ditë më herët nga sekretari i Përgjithshëm i Kombeve të Bashkuara, Antonio Guterres, dhe sekretari amerikan i Shtetit, Antony Blinken.

Daglo tha përmes një deklarate tha se ai kishte “diskutuar për krizën aktuale” me Guterres dhe se biseda ishte “përqendruar në një armëpushim humanitar, rrugë të sigurta për evakuim dhe në mbrojtjen e punëtorëve të ndihmës”.

Po ashtu, gjatë javës ishin shpallur dy armëpushime 24-orëshe, por të cilat nuk janë respektuar.

LEXONI GJITHASHTU:

• Gjykata e Lartë në SHBA lejon përdorimin e pilulave për abort
• Dita kombëtare e çajit, britanikët jo më të apasionuar pas pijes tradicionale