Lukashenko: Putin gati të ofrojë një propozim “shumë të mirë” për paqen në Ukrainë

Presidenti i Bjellorusisë, Alexander Lukashenko, deklaroi se presidenti rus Vladimir Putin është i gatshëm të paraqesë një “propozim shumë të mirë” për t’i dhënë fund luftës në Ukrainë një iniciativë që, sipas tij, gëzon edhe mbështetjen e Shteteve të Bashkuara.

Deklarata vjen pas një takimi pesëorësh mes Lukashenkos dhe Putinit në Moskë. Kreu bjellorus nuk zbuloi detaje rreth përmbajtjes së propozimit, por tha se Putin ua kishte prezantuar idetë e tij paqësore edhe homologut amerikan, Donald Trump, gjatë një samiti të zhvilluar muajin e kaluar në Alaska.

“Unë dhe Presidenti Putin e diskutuam, por nuk do të flas për të. Presidenti vetë do të flasë,” tha Lukashenko për gazetarin rus Pavel Zarubin, duke e cilësuar nismën si “një propozim shumë i mirë” dhe duke theksuar se Trump e kishte dëgjuar me vëmendje dhe kishte udhëtuar në Uashington për ta diskutuar më tej.

Nëse Ukraina refuzon këto kushte, Lukashenko paralajmëroi për pasoja të rënda. “Situata do të jetë siç ishte në fillim të operacionit ushtarak special, madje edhe më keq: ata do ta humbasin Ukrainën”, u shpreh ai, duke përdorur terminologjinë që Moska përdor për pushtimin e fqinjit të saj perëndimor.

Deri më tani, Rusia ka kërkuar kushte që Kievi i konsideron të papranueshme – përfshirë dorëzimin e territoreve, heqjen dorë nga integrimi në NATO dhe kufizime në forcat e armatosura.

Në një kthesë të papritur këtë javë, Donald Trump tha se Ukraina është në gjendje të rimarrë të gjithë territorin e saj përfshirë rajonet që aktualisht kontrollohen nga Rusia dhe duhet të veprojë shpejt, pasi ekonomia ruse po përjeton vështirësi të mëdha. Kremlini hodhi poshtë komentet e Trump, duke pretenduar se ato ishin ndikim i takimit të tij me presidentin ukrainas Volodymyr Zelensky.

Nga ana tjetër, Zelensky e akuzon Putinin se po simuluar dëshirën për negociata paqeje, ndërkohë që nuk është i sinqertë në qëllimet e tij.

“Për të mos humbur të gjithë Ukrainën, Zelensky do të duhet jo vetëm të negociojë, por edhe të pranojë kushte të favorshme kushte të miratuara nga amerikanët”, theksoi Lukashenko.

Ai shtoi se një zgjidhje mund të arrihet vetëm përmes një tryeze të përbashkët mes tre udhëheqësve sllavë, Putinit, Zelenskyt dhe vetë atij.

Ukraina ka kërkuar një takim të drejtpërdrejtë mes Zelenskyt dhe Putinit, por Moska këmbëngul se një gjë e tillë është e mundur vetëm nëse udhëheqësi ukrainas pranon të udhëtojë në Moskë.

Lukashenko, i cili ka qenë një mbështetës i hapur i Moskës, nuk ka angazhuar trupa bjelloruse në luftë, por ka qenë nën sanksione të rënda perëndimore për mbështetjen ndaj agresionit rus dhe për shkeljet e të drejtave të njeriut në vendin e tij.

Ndërkohë, marrëdhëniet e tij me Trump duket se janë përmirësuar kohët e fundit. Ish-presidenti amerikan e ka telefonuar personalisht, e ka lavdëruar dhe ka dërguar një të dërguar në Minsk për bisedime që çuan në lirimin e mbi 50 të burgosurve politikë.