“Mace e zezë” për Liverpoolin, Crystal Palace fiton sërish dhe e eliminon nga Kupa

Liverpool i ka dhënë lamtumirën Kupës së Ligës në Angli, pasi është mposhtur nga Crystal Palace, që është kthyer në një “mace të zezë” për kampionët në fuqi të Premier League.

Dueli i së mërkurës u dominua nga të besuarit e trajnerit Glasner, teksa në anën tjetër Liverpool kishte bërë rotacion të plotë dhe diferencat ishin të ndjeshme në fushë.

Pjesa e parë u mbyll në shifrat 0-2 me dopietën e Sarr, ndërsa në fraksionin tjetër ishte Yeremy Pino që vulosi triumfin 0-3, me Crystal Palace që i jep një shuplakë të fortë Liverpoolit dhe trajnerit Slot.

Kjo ishte hera e tretë këtë sezon që Crystal Palace mposht “të kuqtë”, pasi u rrëmbeu Superkupën, i mori 3 pikë në kampionat dhe tani i eliminon nga Kupa.

Në sfidat e tjera siguruan kualifikimin Chelsea, Man City, Newcastle dhe Arsenal.

Këta të fundit mposhtën Brightonin në një formacion me shumë ndryshime, por mjaftuan golat e Nketiah dhe Saka për të marrë fitoren.

Man City i Guardiolës e nisi jo mirë përballë Swansea, që gjeti e para avantazhin me Franco.

Më pas “qytetarët” realizuan tre herë me Doku, Marmoush dhe Cherki. Sa i përket dy sfidave të tjera, Wolves–Chelsea u mbyll 3-4 dhe Newcastle–Tottenham 2-0.

Në raundin tjetër të kompeticionit, Arsenal përballet me Crystal Palace, Cardiff me Chelsean, Man City me Brentford dhe Newcastle me Fulham.