Macron: E ardhmja e Ukrainës nuk mund të vendoset pa ukrainasit

Presidenti francez Emmanuel Macron ka deklaruar se e ardhmja e Ukrainës nuk mund të vendoset pa pjesëmarrjen aktive të vetë ukrainasve.

Kreu i Elizesë zhvilloi një bisedë telefonike me presidentin ukrainas Volodymyr Zelenskyy, vetëm pak ditë para samitit mes presidentit amerikan Donald Trump dhe homologut të tij rus Vladimir Putin, i cili pritet të mbahet më 15 gusht në Alaska dhe ka për synim gjetjen e një zgjidhjeje për t’i dhënë fund luftës në Ukrainë.

Përmes një postimi në platformën X, Macron bëri të ditur se përveç Zelenskyyt, ka komunikuar gjithashtu me kancelarin gjerman Friedrich Merz dhe kryeministrin britanik Keir Starmer, duke theksuar rëndësinë e unitetit evropian në këtë proces.

“Evropianët gjithashtu domosdoshmërisht do të jenë pjesë e zgjidhjes, pasi siguria e tyre është në rrezik”, shkruan Macron në postimin e tij, duke shtuar se koordinimi i ngushtë me partnerët evropianë dhe me presidentin Zelensky do të vazhdojë në ditët në vijim.

Presidenti francez nënvizoi mbështetjen e palëkundur të Parisit për Kievin dhe theksoi se ajo mbështetje do të vijojë në frymën e Koalicionit të të Vullnetshmëve, një nismë ndërkombëtare për mbështetjen e Ukrainës në përballjen me agresionin rus.

LEXONI GJITHASHTU: 

• Macron bisedon me Vuçiç: Dënojmë hapat e njëanshëm që minojnë dialogun Serbi-Kosovë
• Macron dhe Vuçiç diskutojnë për dialogun Kosovë-Serbi dhe situatën në Bosnje