Macron: Nëse dështon konflikti në Ukrainë, rrezikohet besueshmëria e Perëndimit

Presidenti francez Emmanuel Macron paralajmëroi se besueshmëria e Perëndimit do të vihet në pikëpyetje nëse Shtetet e Bashkuara dhe vendet evropiane nuk arrijnë të zgjidhin me shpejtësi konfliktin në Ukrainë.

Duke folur në forumin global të sigurisë Shangri-La Dialogue në Singapor, Macron theksoi se dështimi për të adresuar në kohë luftën në Ukrainë do të kishte pasoja serioze në nivel ndërkombëtar.

“Nëse as SHBA-të dhe as evropianët nuk janë në gjendje ta rregullojnë situatën ukrainase në një afat të shkurtër, mendoj se besueshmëria si tek SHBA-të ashtu edhe tek evropianët që pretendojnë të rregullojnë çdo krizë në këto rajone do të jetë shumë e ulët,” tha Macron.

Ai nënvizoi se ky dështim do të cenonte jo vetëm sigurinë në Evropë, por edhe do të dobësonte ndikimin e Perëndimit në Azi, veçanërisht përballë sfidave në rritje nga Kina.

Deklaratat e Macron vijnë në një kohë kur lufta në Ukrainë ka hyrë në vitin e tretë dhe përpjekjet diplomatike ndërkombëtare për t’i dhënë fund konfliktit nuk kanë sjellë përparim të dukshëm.