Macron: SHBA dhe Evropa duhet të punojnë së bashku për paqen dhe sigurinë e Ukrainës

Presidenti francez Emmanuel Macron tha se Shtetet e Bashkuara kanë nevojë që “evropianët të avancojnë përpjekjet e tyre për paqe” në Ukrainë, duke theksuar rëndësinë e bashkëpunimit Evropë-Amerikë në një kohë kur qasjet e tyre të ndryshme ndaj bisedimeve po vënë në provë aleancën e tyre.

Sipas tij, uniteti mes amerikanëve dhe evropianëve për çështjen e Ukrainës është i domosdoshëm.

“Duhet të punojmë së bashku, duhet të punojmë bashkë. Ne i mirëpresim dhe mbështesim përpjekjet për paqe që janë ndërmarrë nga SHBA”, tha Macron para gazetarëve në Universitetin e Sichuanit në Chengdu, Kinë.

Megjithatë, Macron theksoi se SHBA-të kanë nevojë edhe për kontributin evropian, pasi “kjo po ndodh në kontinentin evropian dhe ne jemi ofruesit e garancive të sigurisë, ne jemi ata që mund të flasim për sanksionet, ne jemi ata që kemi në duar asetet ruse të ngrira, për të përmendur disa shembuj”.

“Dhe është përmes këtij partneriteti që kjo mund të jetë efektive. Kështu që, asnjë mosbesim, përkundrazi, bashkëpunim, në shërbim të Ukrainës, të së drejtës ndërkombëtare dhe sigurisë sonë kolektive”, u shpreh ai.

LEXONI GJITHASHTU:

• Macron bën thirrje për rritjen e presionit ndaj Rusisë gjatë vizitës së tij në Kinë
• SHBA rifillon sulmet ndaj narko-anijeve, vriten 4 persona në Oqeanin Paqësor