Qeveria pro-europiane e Malit të Zi është tronditur nga një konflikt me kishën Ortodokse Serbe, e cila po proteston kundër ligjit që detyron regjistrimin e pronave të kishës.

Protestuesit thonë se kisha mund t’u sekuestrojë kishat dhe varrezat ortodokse serbe, ndërkohë që qeveria këmbëngul se ligji është duke u keqinterpretuar.

Andrija Mandic, një nga drejtuesit e opozitës pro-serbe, këmbëngul se serbët e Malit të Zi ndiheshin se po trajtoheshin si qytetarë të dorës së dytë dhe po diskriminohen me investime, punësim në administratë dhe arsim.

“Është problem i madh, i krijuar nga autoritetet. Serbët diskriminohen në investime, në arsim dhe në politikat e punësimit. Serbët nuk vendosen asnjëherë në role të rëndësishme në administratë, polici apo ushtri”, thotë ai.

Andrej Nikolaidis, një shkrimtar malazez dhe këshilltar politik, i sheh këto pikëpamje si diçka të rrezikshme.

Nikolaidis ka nisur një peticion në mbrojtje të qeverisë së Malit të Zi, të firmosur nga intelektualë të ndryshëm nga i gjithë Ballkani.

“Janë të njëjtat shenja që u dhanë para nisjes së luftës ne Kroaci dhe Bosnje”, tha Nikolaidis për Euronews.

“Retorika për të ashtuquajturën ‘shtypje’ të popullit serb është i ngjashëm me retorikën që u përdor nga serbët ne Kroaci, para se të niste lufta. Më pas dëgjuam se serbët po shtypeshin në Bosnje, dhe lufta nisi edhe atje. Më pas dëgjuam papritur se serbët po shtypeshin në Kosovë, dhe pastaj pati luftë në Kosovë”.

Për 90 vite, Mali i Zi ka qenë pothuajse pjesë e Serbisë, derisa mori pavarësinë, në vitin 2006.

70% e popullsisë janë ortodoksë, shumica ndjekës të ritualeve të Kishës Ortodokse Serbe, ndërsa një pakicë e vogël ndjek Kishën Ortodokse Malazeze.

Me ligjin e ri, grupet fetare që nuk ofrojnë dot dëshmi pronësie, rrezikojnë t’u sekuestrohen tokat dhe ndërtesat nga shteti.

Qeveria thotë se ata po sqarojnë se cili është pronar i ligjshëm, ndaj dhe i fton bashkësitë fetare që të regjistrojnë pronat.