“Malvinas janë argjentinas”, Britania thirrje FIFA-s të hetojë Argjentinën për banderolën që shfaqën lojtarët

Qeveria britanike i kërkoi të enjten FIFA-s të hetojë ekipin e Argjentinës pasi lojtarët që festuan fitoren 2-1 ndaj Anglisë në gjysmëfinalet e Kupës së Botës me një banderolë që pretendonte sovranitet mbi Ishujt Falkland.

Gjatë festimeve pas ndeshjes të mërkurën në Atlanta, lojtarët argjentinas mbanin një banderolë të dorëzuar nga tifozët, ku shkruhej “Las Malvinas son Argentinas” që do të thotë “Malvinas janë argjentinas”.

Argjentina i quan Ishujt Falkland si Ishujt Malvinas. Ato u pushtuan në vitin 1982 me urdhër të diktaturës së atëhershme ushtarake të Argjentinës, duke shkaktuar një luftë 10-javore të fituar nga Britania.

“Kupa e Botës mund të mos jetë e jona, por Ishujt Falkland padyshim që janë”, tha të enjten një zëdhënës i kryeministrit Keir Starmer. “Vetëvendosja u takon banorëve të ishullit dhe angazhimi ynë ndaj Ishujve Falkland nuk do të lëkundet kurrë.”

Starmer mbështeti thirrjet që FIFA të hetojë, tha zëdhënësi, pasi Sekretari i Biznesit i Mbretërisë së Bashkuar, Peter Kyle, tha se sjellja e lojtarëve ishte krejtësisht e papërshtatshme.

FIFA mund të ndjekë penalisht lojtarët dhe federatën e futbollit të Argjentinës sepse kodi i saj disiplinor ndalon në stadiume çdo mesazh që nuk është i përshtatshëm për një ngjarje sportive, duke përfshirë ato me natyrë politike, ideologjike, fetare ose ofenduese. Gjobat e FIFA-s për mesazhe politike variojnë nga rreth 5,000 deri në 20,000 dollarë.

Presidenti argjentinas, Javier Milei, e përshkroi festimin e lojtarëve me banderolën si “krejtësisht të vlefshëm”, duke thënë se mesazhi pasqyron një ndjenjë të përbashkët për të gjithë argjentinasit. Por ai tha se priste që FIFA ta sanksiononte ekipin me një gjobë.

“Ajo që bëjnë lojtarët është e kuptueshme; ata rrëmbehen nga emocionet e tyre, veprojnë impulsivisht dhe kjo ka të ngjarë të çojë në diskutime rreth një gjobe”, tha Milei për një stacion radiofonik lokal në Buenos Aires.