Për herë të parë, Parlamenti Europian ka deklaruar se marrëveshja përfundimtare ndërmjet Kosovës dhe Serbisë duhet të bazohet në njohjen reciproke.
Autori i raportit për Serbinë, Vladimir Bilçik (EPP), u tha gazetarëve se nuk ishte i kënaqur që shprehja “njohje reciproke” është përfshirë në tekstin e amendamentit, raporton Kosova Press.
“Shumica e qeverive e njohin Kosovën dhe kanë shumicën në Parlamentin Evropian dhe ka qenë vendim politik i shumicës politike që ta përfshijë këtë në tekst. Po, çështja e njohjes reciproke është në tekst, por njohja nuk është në dorën e Parlamentit dhe këtë duhet ta kuptojë publiku serb”, u shpreh Bilçik.
Ai ritheksoi se çështja e njohjes së Kosovës është privilegj dhe e drejtë ekskluzive e qeverive të vendeve anëtare të BE-së dhe se në këtë moment nuk sheh ndonjë përparim drejt njohjeve të mundshme.
Bilçik konfirmoi se është në kontakt me qeverinë e tij në Sllovaki dhe shprehu besimin se çështja e njohjes “nuk është temë” në Bratislavë.
Për raportin përfundimtar për Serbinë në Komisionin për Punë të Jashtme të Parlamentit (AFET) votuan 50 anëtarë të AFET-it, pesë ishin kundër dhe tre abstenuan.
Krahas marrëdhënieve me Kosovën dhe sundimit të ligjit në vend, raporti i votuar përfshin edhe harmonizimin me politikat e sanksioneve kundër Rusisë, si përcaktues i progresit të përgjithshëm të Serbisë në procesin e anëtarësimit në BE.
LEXONI GJITHASHTU
- PE: Marrëveshja finale Kosovë-Serbi të bazohet në njohjen reciproke
- Kosova feston 23-vjetorin e çlirimit, Kurti: S’e harrojmë kurrë të kaluarën
- Osmani: Kosova është e bekuar me mbështetjen nga kancelari Scholz
