Marseja plot me plehra, punonjësit e pastrimit në grevë

Marseja është mbushur plot me plehra. Punonjësit e pastrimit janë në grevë prej tre javësh.

Qyteti i dytë më i madh i Francës rrezikohet nga ndotja duke qenë se koshat janë tejmbushur dhe plehrat janë përhapur nëpër rrugë. Rrezikohet dhe hapësira ujore sepse era që fryn me 130 km në orë po i afron mbeturinat në det.

Aktivistë të organizatës joqeveritare “1 mbeturinë në ditë” kanë dhënë alarmin për rrezikun që i kanoset qytetit.

 “Situata është problematike. Nëpër rrugë shohim vetëm mbeturina, të cilat i merr era dhe përfundojnë direkt në det. Ndaj situata është shumë shqetësuese,” – deklaroi kryetari Alexandre Mournier.

Punonjësit e pastrimit janë në grevën e tretë brenda katër muajve. Autoritetet vendore insistojnë se turni nuk duhet mbyllur kur punonjësit mendojnë se ka mbaruar puna. Kundërshtia e punonjësve ndaj këtij sistemi ka sjellë 3-4 mijë tonelata plehra të pa mbledhura.

Në dekadën e fundit, Marseja është prekur çdo vit nga të tilla bojkote.

Kryetari i Bashkisë së qytetit deklaroi se do të angazhonte kamionë për të mbledhur mbeturinat, i alarmuar nga veprimet e banorëve që zgjedhin t’u vënë zjarrin plehrave.

Administrata vendore ka punësuar edhe kompani private, por ato kanë mbledhur fare pak tonelata mbeturina, duke lënë disa mijëra tonë të tjera në rrugët e Marsejës.

LEXONI GJITHASHTU:

• Koleksionuesit e maskave, ndërgjegjësim për pastërti duke mbledhur maska në rrugë nga Marseja në Paris