Masat e reja kufizuese në Kosovë, gastronomët kundër, Veton Zuka: S’parashikohen ndihma ekonomike, jemi drejt falimentit

Pasi Kryeministri i Kosovës, Avdullah Hoti, prezantoi masat e reja për parandalimin e përhapjes së COVID-19. Shoqata e Gastronomëve të Kosovës, përmes një njoftimi publik u shpreh se masat e prezantuara nga qeveria e Kosovës do të dëmtojnë edhe më shumë ekonominë dhe sektorin e gastronomisë.

Pjesëtarët e kësaj shoqate kanë kërkuar nga qeveria që sektori i gastronomisë të subvencionohet me një paketë ekonomike në vlerë prej 10 milionë eurosh. Ata kërkojnë që brenda një afati shtatë ditor të merren parasysh kërkesat e tyre.

Kryetari i shoqatës për Prishtinën, Veton Zuka komentoi zhvillimin e fundit për Euronews Albania.

Ai tha se nëse qeveria diskuton vetëm masat si mbyllja apo kufizimet dhe aspak për çështjet ekonomike, ndihmat dhe subvencionimit të dëmeve që rrjedhin nga këto masa “atëherë është e kotë dhe duhet të reagohet”.

“Janë kërkesa të thjeshta, kërkojmë veç mbijetesën, subvencione në paga, për qiratë 40-50% dhe për nxitjen e bashkëpunimit me bankat që s’po japin kredi dhe nga ana tjetër interesat e atyre që kanë marrë hua nuk janë lëvizur, këto janë kërkesat e momentit për ne,” – u shpreh Zuka.

Gazetari Eno Muja i kujtoi Zukës postimin në Facebook ku gastronomët i kanë shpallur “non-grata” anëtarët e qeverisë së Kosovës.

“Po, është një simbolikë dhe shprehje e mllefit, sepse ne jemi nën presion edhe nga bizneset dhe ka qenë një ide e gastronomëve pasi presioni i madh për protesta dhe nga ana tjetër gjendja nën pandemi po e bën të detyrueshme një reagim, nga ana tjetër nga fakti se nuk ka ndryshim na e bën të detyrueshëm protestën,” – shtoi më tej kryetari i shoqatës së gastronomëve.