Policia e Tiranës ka zbardhur një aktivitet të paligjshëm që kryhej në një apartament të përshtatur si call center. Në këtë operacion janë kapur shtetas që mashtronin qytetarë të huaj për të investuar në bursa fiktive, duke përdorur metoda telefonike.

Si rezultat i ndërhyrjes, është arrestuar shtetasi me iniciale L. Xh., 37 vjeç, i cili ishte organizatori i veprimtarisë, ndërkohë që janë proceduar në gjendje të lirë 5 shtetas të tjerë, të cilët u kapën gjatë ndërhyrjes nga Policia në apartamentin në rrugën “Panorama”.

Ndërkohë, është shpallur në kërkim shtetasi me iniciale R. M., 37 vjeç, i cili kishte marrë me qira apartamentin për të realizuar këtë veprimtari të paligjshme.

Gjatë operacionit, janë sekuestruar pajisje kompjuterike, celularë dhe prova të tjera materiale që vërtetojnë veprimtarinë mashtruese të këtij grupi.

Përveç arrestimit të L. Xh., janë nisur procedime penale për shtetasit D. O., 19 vjeç, J. B., 20 vjeç, R. L., 26 vjeç, J. D., 24 vjeçe dhe E. N., 34 vjeçe, të cilët u kapën gjatë operacionit.

Policia po vijon kërkimin për kapjen e shtetasit R. M., ndërkohë që hetimet për zbardhjen e plotë të këtij aktiviteti kriminal janë në vazhdim.

LEXONI GJITHASHTU:

• Gazetari zbulon detaje nga vrasja e 22-vjeçares shqiptare e gjendur në valixhe
• Ngacmoi seksualisht të miturën, Prokuroria Fier kërkon arrest me burg për autorin