Mbi 1.000 civilë afganë të vrarë që kur talibanët morën pushtetin

Mbi 1.000 civilë afganë kanë vdekur si pasojë e bombardimeve dhe formave tjera të dhunës që kur forcat e huaja janë larguar nga shteti, dhe talibanët e kanë marrë pushtetin më 2021, sipas Kombeve të Bashkuara.

Misioni i OKB-së në Afganistan ka thënë se në periudhën 15 gusht 2021 – maj 2023, 1.095 civilë janë vrarë dhe 2.679 janë plagosur.

Shumica e vdekjeve – mbi 700 – janë shkaktuar nga pajisjet e improvizuara shpërthyese, përfshirë bombat vetëvrasëse në ambiente publike, siç janë xhamitë, qendrat e edukimit dhe tregjet.

Sipas misionit të OKB-së, grupi ekstremist, Shteti Islamik, vazhdon të përbëjë sfidë për sigurinë e Afganistanit.

Talibanët kanë thënë se janë të fokusuar në sigurinë e shtetit dhe kanë kryer disa bastisje kundër Shtetit Islamik në muajt e fundit.

Sipas tyre, Afganistani është përballur me sfida të sigurisë që disa dekada, dhe se përgjatë udhëheqësisë së talibanëve situata është përmirësuar.

Prej kthimit në pushtet, në gusht të vitit 2021, talibanët kanë nisur të zbatojnë rregullore dhe ligje të ashpra, përfshirë ndalesën ndaj grave dhe vajzave në shkollim, pas klasës së gjashtë.

LEXONI GJITHASHTU:

• Shpërthim në xhaminë në Afganistan, vriten 11 persona
• Të paktën 19 të vrarë pas shpërthimit në një xhami në Afganistan