Mbledhja e Byrosë së Kuvendit, Grupi Parlamentar i PD kërkesë Peleshit: Të jetë me dyer të hapura

Byroja e Kuvendit këtë të martë do të mblidhet lidhur me ankimin e deputetëve të Partisë Demokratike për përjashtimin e tyre. Mbledhja nis në orën 11:00.

Grupi Parlamentar i Partisë Demokratike përmes një kërkese drejtuar kryetarit të Kuvendit, Niko Peleshit kërkojnë që mbledhja të jetë e hapur dhe të jenë të pranishme mediat.

“I Nderuar Z. Kryetar, Në cilësinë e anëtarit të Byrosë së Kuvendit, në kuadër të transparences dhe interesit të opinionit publik, si dhe ndjeshmërisë së çeshtjeve për diskutim, kërkoj që mbledhja e sotme e Byrosë së Kuvendit, në orën 11:00, të zhvillohet me praninë e mediave dhe gazetarëve”, shkruhet në kërkesën e Këlliçit.

Komisioni i Etikës në dhjetori pas kërkesës së PS-së, përjashtoi me 30 ditë 6 deputetë të Partisë Demokratike. Deputetët e përjashtuar janë Belind Këlliçi, Flamur Noka, Elda Hoti, Fidel Kreta, Albana Vokshi dhe Klevis Balliu.