Mbretëria e Bashkuar miraton një projektligj të ri kundër duhanit

Mbretëria e Bashkuar ka miratuar një projektligj të ri kundër duhanit që vendos kufizime të përhershme për shitjen e produkteve të duhanit për të gjithë personat e lindur më 1 janar 2009 ose më pas.

Sipas këtij ligji, individët e prekur do të kenë ndalim të përjetshëm për blerjen e cigareve, cigareve elektronike dhe duhanit të nxehtë. Politika synon të rrisë çdo vit moshën ligjore të shitjes me një vit, duke bllokuar në mënyrë graduale dhe të përhershme aksesin për grupmoshat më të reja.

Qeveria britanike e ka cilësuar këtë masë si një “hap historik” drejt krijimit të një brezi pa duhan. Paketa përfshin gjithashtu ndalimin e përdorimit të cigareve elektronike në makina ku ka fëmijë, në kënde lojërash dhe në hapësira pranë shkollave, me qëllim mbrojtjen e të rinjve nga ekspozimi ndaj duhanit dhe avujve të cigareve elektronike.

Projektligji është propozuar vitin e kaluar me synimin për të “thyer ciklin e varësisë”. Sipas një studimi të Universitetit të Nottinghamit, kjo politikë mund të sjellë përfitime të mëdha shëndetësore në afatgjatë, duke shtuar dhjetëra mijëra vite jete të shëndetshme.

Parashikimet tregojnë se deri në vitin 2075 mund të fitohen rreth 88,000 vite shtesë jete të shëndetshme krahasuar me mungesën e këtij ligji. Gjithashtu, pritet që prevalenca e duhanpirjes tek të rinjtë 12–30 vjeç të bjerë nën 5% deri në fund të viteve 2040.

Sipas Organizatës Botërore të Shëndetësisë, duhani mbetet një nga shkaqet kryesore të vdekjeve dhe paaftësisë në botë, duke shkaktuar mbi 7 milionë vdekje çdo vit.