Mbreti Abdullah takon Trump, del kundër zhvendosjes së palestinezëve në SHBA

Mbreti Abdullah i Jordanisë ka refuzuar planin e Donald Trump për t’i vendosur palestinezët e zhvendosur në mbretërinë e tij.

Pas një takimi kokë më kokë me presidentin amerikan në Shtëpinë e Bardhë, Abudall shkroi në rrjetin “X” se Jordania mbetet në mënyrë të palëkundur kundër dëbimit të palestinezëve nga Gaza dhe Bregu Perëndimor. “Ky është qëndrimi i përbashkët i botës arabe”, deklaroi monarku.

Ky ishte takimi i parë mes tyre që kur Trump shpalli planin e tij për ta marrë territorin e Gazës dhe për t’i dërguar mbi 2 milionë palestinezë në vende të tjera të rajonit, përfshirë Jordaninë.

Në ditët e fundit, ai sugjeroi se mund të ndërpresë ndihmat për Jordaninë dhe Egjiptin nëse ato nuk pranojnë palestinezët.

Jordania, një aleat i rëndësishëm i Shteteve të Bashkuara në Lindjen e Mesme, strehon prej kohësh miliona palestinezë.

Ndërsa u shpreh i gatshëm të pranojë rreth 2 mijë fëmijë nga Gaza që kanë nevojë për mjekim, mbreti Abdullah theksoi se rindërtimi i enklavës dhe zgjidhja e krizës së saj humanitare duhet të marrë përparësinë.

Por, duke folur përpara gazetarëve në Dhomën Ovale, përkrah monarkut, Trump sinjalizoi se nuk ka ndërmend të tërhiqet nga ideja e tij, që ka shkaktuar reagime globale.

“Ne do ta marrim Gazën, do ta mbajmë atë dhe do ta lulëzojmë”, deklaroi Trump, teksa Abdullah qëndronte i heshtur pranë tij.

LEXONI GJITHASHTU:

• Palestinezët vazhdojnë të kthehen në shtëpi pavarësisht deklaratave të Trump
• Tarifat e Trump, Kanadaja e gatshme për përgjigje të ashpra ndaj SHBA-së