Mbrojtja e trashëgimisë kulturore, Shqipëria e ftuar në Itali për restaurimin e objekteve historike

Restaurimi dhe mbrojtja e trashëgimisë kulturore mbetet një nga pikat kryesore në politikën e Ministrisë së Kulturës, e cila për herë të parë do të marrë pjesë në dy aktivitete të rëndësishme në Itali, konkretisht në Sallonin Ndërkombëtar të restaurimit dhe Javën e Restaurimit.

Por cilat do të jenë përfitimet nga bashkëpunimi mes dy vendeve për ruajtjen e trashëgimisë kulturore?

“Se si të shtrijmë gjithmonë e më tepër tashmë një qendër formim për restauratorët në kantiere konkrete, jo vetëm për profesionistë që duhet të jenë në kontakt me praktikat e sektorit, por edhe për të bërë të mundur bashkëpunimin me të rinjtë”, tha ministrja shqiptare e Kulturës, Elva Margariti.

Ambasadori i Italisë në Shqipëri, Fabrizio Bucci, theksoi rëndësinë e këtij sektori në ekonomi dhe përse duhet të investohet në të.

“Në Itali sektori i restaurimit është themelor me 6% të GDP, punëson 150 mijë qytetarë, pra këto shifra na tregojnë sa e rëndësishme është kultura dhe nga pikëpamja ekonomike, dhe nga pikëpamja e krijimit të vendeve të punës. Sektori i kulturës është themelor në përgjithësi, sepse përfaqëson të kaluarën dhe nëse e shohim në mënyrë të veçantë pjesën tregtare dhe ekonomike kultura përfaqëson edhe të ardhmen”, tha Fabrizio Bucci, ambasadori i Italisë.

Ministria e Kulturës e konsideron një bashkëpunim të rëndësishëm për të mësuar nga përvoja e vendit fqinj, ndërsa një tjetër mision nga Italia pritet të mbërrijë në Shqipëri për të vulosur protokollin kulturor mes dy vende.