Ndërmjetësit e bisedimeve për armëpushimin në Gaza deklaruan të premten se negociatat dyditore u mbyllën dhe se tani synohet që javën e ardhshme, në Kajro të nënshkruhet marrëveshja për ndalimin e luftimeve.

Përmes një deklarate, përfaqësuesit e Shteteve të Bashkuara, Egjiptit dhe Katarit deklaruan se bisedimet kishin qenë konstruktive dhe ishin zhvilluar në një atmosferë pozitive.

Ata u paraqitën të dyja palëve një propozim dhe shpresojnë të vazhdojnë punën për detajet e përmbushjes së marrëveshjes në ditët e ardhshme.

Diplomacia ndërkombëtare për të parandaluar përhapjen e luftës në Gaza në një konflikt rajonal u intensifikuan në orët e para të së premtes, kur ministrat e Jashtëm të Britanisë dhe Francës udhëtuan së bashku në Izrael, ku zhvilluan një sërë bisedimesh paralelisht me negociatat në Katar.

Përpjekjet e reja për t’i dhënë fund luftës mes Izraelit dhe Hamasit vjen në një kohë kur bilanci i viktimave palestineze në Gaza arriti në 40 mijë persona, sipas autoriteteve të lëvizjes islamike.

Ndërkohë, mbetet e lartë frika se Irani dhe militantët e Hezbollahut në Liban mund të sulmojnë Izraelin për t’u hakmarrë për vrasjen e liderëve të milicive të tyre.

Ndërmjetësit ndërkombëtarë besojnë se shpresa më e mirë për çtensionimin e situatës do të ishte një marrëveshje që do të ndalte luftimet dhe lironte pengjet izraelite.

Sekretari i Jashtëm britanik David Lammy dhe ai francez Stéphane Séjourné u shfaqën optimistë pas takimit të së premtes me homologun izraelit, Israel Katz.

Të dy kryediplomatët deklaruan se autoritetet hebraike u kishin thënë se shpresonin se ndodheshin pranë nënshkrimit të një akordi.