Mbyllet gjykata e Pogradecit, shkalla e parë kalon në Korçë

Gjykata e shkallës së parë e Pogradecit është mbyllur zyrtarisht. Të gjitha dosjet që janë në proces për gjykim dhe që arrijnë në 600 do të transferohen për gjykim në Gjykatën e Shkallës së Parë Korçë.

Sipas avokatit Endri Çela kjo mbyllje ka rritur kostot e qytetarëve prej disa javësh tashmë dhe nga ana tjetër edhe 20 avokatë në Pogradec po mendojnë zhvendosjen nga ky qytet.

“Kjo do të sjellë rritje të kostove dhe shtyrje të afateve, pra kohë kur do të përfundojë një gjyq do të zgjatet në krahasim me më përpara për shkak të mbingarkesës se gjykatave me dosje të reja. Arsyen pse do të rriten kostot është largimi i gjykatës, tarifa e avokatit do të rritet por edhe ata qytetarë që duan ta ndjekin nga afër seancën gjyqësore do duhet të paguajnë me tepër se me parë,” – u shpreh ai.

Për avokaten korçare Eta Xoga të shpeshta janë rastet kur qytetarët e kanë humbur shpresën te drejtësia, duke kryer edhe vetëgjyqësi.

“Na ndodh tashmë që shumë njerëz nuk tregojnë interes në marrjes e drejtësisë por përpiqen të gjejnë rrugë apo mënyra të tjera. Ka njerëz që sot thonë” Lere, në djall të vejë”, për çështje që kërkojnë një kohë shumë të gjatë. Për shembull gjithë çështjet e gjykatave të apelit të Korçës dhe apeleve të tjera të cilat në 1 Mars kaluan në Tiranë nuk janë shpallur për seanca gjyqësore,” – tha Xoga.

Mbyllja e kësaj gjykatës së Pogradecit ndodhi si pasojë e hartës së re të gjyqësorit e cila në qarkun  Korçë ka mbyllur gjykatën e apelit dhe atë civile. Bashkë me gjykatën e Pogradecit shkrihet edhe prokuroria si edhe shërbimi i provës.

LEXONI GJITHASHTU:

• VKM për ndërtimet pa leje, Gjykata Kushtetuese nis shqyrtimin e kërkesës së PD
• Aksident në Korçë-Pogradec, dy makina përplasen kokë më kokë