Mbyllet “Mik Festival”, mblodhi në Prespë artistë shqiptarë dhe të huaj

Sezoni i katërt i “Mik Festival” në Prespë është mbyllur mbrëmjen e së dielës. Aktiviteti mblodhi bashkë artistë shqiptar dhe të huaj, në një ditë të mbushur plot aktivitete.

Vokalisti nga Ansambli i Zanave këndoi akapela në ishullin e Maligradit. Zëri melodioz, vendi i virgjër dhe pamja mahnitëse bëri që të pranishmit të shijonin këngët shqiptare dhe të huaja të kënduara nga pesë pjesëtaret e grupit.

Violinisti Olen Çezari, i cili performoi gjithashtu tha se ky aktivitet i ka shërbyer pr ta njohur më mirë zonën e Prespës.

“Inva Mula, gjigandja ka marrë këtë iniciativë gjigande që sjell artistë dhe publik, që ne të njohim këtë përrallë të Shqipërisë që as unë nuk e njoh. Hera parë që vija në këtë rrugë, hera parë që kuptoj që ka një ishull në mes të Prespës. Janë çudira, por është e vërteta. Ne xhirojmë botën dhe nuk njohim vendin tonë,” – u shpreh ai.

Ministri i Mjedisit dhe Turizmit Blendi Klosi ka përgëzuar mbajtjen e këtij evenimenti dhe deklaroi se ky sezon turistik ka qenë më i suksesshëm se vitet e tjera.

“Shqipëria tashmë po përjeton një mani të madhe për t’u vizituar. Kemi numër të shtuar (vizitorësh), madje dhe më shumë se 2019-a që ka qenë viti më i artë dhe kjo falë një promovimi më të madh të Shqipërisë. Na duhet shumë më tepër të promovojmë bukuritë e natyrës shqiptare, të promovojmë Shqipërinë përveç detit dhe kështu të kemi një ofertë të plotë turistike,” – tha Klosi.

Sopranoja Inva Mula, njëkohësisht organizatore shprehet e kënaqur nga emocionet që ky aktivitet fali në Korçë, Kolonjë dhe Prespë.

“Me modestinë më të madhe po them, ishte një fresk i vërtetë i atmosferave, gjuhëve dhe zhanerëve të ndryshme muzikore, artistë të mrekullueshëm që u ngjitën në skenë, në Korçë, në Prespë, në Rehovë. Jam vërtetë shumë e lumtur,” – u shpreh artistja.

Te pranishëm ne këtë aktivitet kanë qenë dhe diplomatë amerikanë, gjermanë, grekë e suedezë.

LEXONI GJITHASHTU: 

• Sali Butka kthehet në Kolonjë, një përmendore në mes të qytetit për atdhetarin e shquar
• “Porto Palermo Festival”, Olen Çesari në një muaj mbledh artistë shqiptarë dhe të huaj
• Regjisoret gra në fokus të Festivalit të Filmit në Prishtinë