Meloni nën presion/ Opozita: Dështoi në menaxhimin e krizës migratore

Mbi 100 mijë emigrantë kanë zbarkuar në brigjet e Italisë këtë vit. Bëhet fjalë për më shumë se dyfishin e numrit të regjistruar në të njëjtën periudhë të vitit të kaluar.

Opozita ka kritikuar koalicionin qeverisës, të udhëhequr nga Giorgia Meloni dhe Matteo Salvini, për dështim në menaxhimin e krizës.

“Duket sikur qeveria e Giorgia Meloni-t po përballet me krizën e parë reale të saj. mbi 100 mijë emigrantë kanë mbërritur në Itali që nga fillimi i vitit dhe sipas të dhënave zyrtare është shifra më e lartë e regjistruar që prej 2017-s. Dhe gjasat janë që kuota të kapë rekordin më të lartë prej 180 mijë emigrantësh, që mbërritën në Itali në 2016-n”-tha Giorgia Orlandi, Euronews

Qeveria e djathtë e Giorgia Melonit erdhi në pushtet duke premtuar mes të tjerash dorë të hekurt ndaj trafikantëve, por edhe frenim të fluksit të emigracionit që vjen nga Afrika e Veriut. Ne e dimë se shumica e këtyre emigrantëve nisen nga Tunizia, ku grumbullohen emigrantët nga pjesa nën-Sahariane.

Por edhe kushtet e motit janë një tjetër arsye përse kaq shumë njerëz vendosin të ndërmarrin këtë udhëtim të vështirë.

Tani, ligjvënësit e opozitës akuzojnë qeverinë e Melonit se ka dështuar në menaxhimin e emigracionit, sidomos pasi Italia dhe BE-ja nënshkruan së fundmi një memorandum mirëkuptimi me Tunizinë, që i jep këtij vendi mbi 100 milionë euro ndihmë për të parandaluar që emigrantët t’i drejtohen Evropës.

LEXONI GJITHASHTU: 

• INSTAT: Më pak lekë nga eksportet, 38 mld lekë në muajin korrik
• “SPAK t’i shkojë në fund sterilizimit”/ Basha: Vepra të Ramës reagon dhe Berisha