Meta shkurton 600 vende pune në departamentin e inteligjencës artificiale

Grupi Meta (Facebook, Instagram) ka vendosur të eliminojë afërsisht 600 pozicione në departamentin e tij të dedikuar për inteligjencën artificiale (IA), si pjesë e racionalizimit të funksionimit të tij, pas një sërë punësimesh, raportuan mediat amerikane dje, të mërkurën.

Vendimi i ekipit drejtues të Metës synon, sipas një raporti në New York Times, të zvogëlojë “fryrjen organizative”, pas një fushate punësimi për të forcuar aftësitë e saj në inteligjencën artificiale.

Sipas një raporti të Wall Street Journal, shumicës së punonjësve të prekur nga shkurtimet e vendeve të punës do t’u ofrohet mundësia për të ndryshuar departamente.

Të dyja gazetat cituan një memo të brendshme nga drejtori i përgjithshëm i IA-së i grupit, Alexander Wang, sipas të cilit ky vendim do të garantonte që “kërkohen më pak diskutime për vendimmarrje”.

Meta nuk u përgjigj menjëherë kur AFP e pyeti për koment.

Grupi i Mark Zuckerberg po bën investime të mëdha në inteligjencën artificiale, ndërsa sipërmarrësi dëshiron të fitojë terren ndaj rivalëve të tij në garën për “superinteligjencë”, teknologji hipotetike me aftësi njohëse superiore se ato të njerëzve, “Graali i shenjtë” i Silicon Valley.

Në mesin e shtatorit, Meta prezantoi syzet e lidhura, të cilat përfshijnë një ekran të integruar dhe aftësi të gjera të inteligjencës artificiale , duke vazhduar bastin e saj për bashkimin e botës reale me atë “virtuale” (dixhitale).

Grupi njoftoi në gusht se po krijonte një organizatë në Kaliforni për të financuar kandidatët vendas që favorizojnë rregullore më pak të rrepta të inteligjencës artificiale, duke përmendur konkurrencën nga Kina.

LEXONI GJITHASHTU:

• BE vendos nën kontroll inteligjencën artificiale, rregullat e reja nga 2 gushti
• Kompania Meta do shfaqë reklama bazuar në ndërveprimet me inteligjencë artificiale