Milan dhe Juventus firmosin me trajnerët e rinj

Ende pa nisur mirë merkato skuadrat kanë kryer lëvizjet e para, kryesisht sa i përket trajnerëve, të cilët më pas do të zbatojnë planet e tyre për sezonin e ri. Nga Italia vijnë lajme të rëndësishme, aty ku Thiago Motta e ka mbyllur me Bolognan, ndërsa do të drejtojë bardhezinjtë e Juventus. Në anën tjetër, rivalët kuqezi kanë zyrtarizuar Fonsecan, me teknikun që rikthehet pas 3 vitesh në kampionatin Italian.

Juventus ishte prej kohësh në tratativa me Bolognan për ish-mesfushorin që zhvilloi një sezon të sukesshëm, duke konfirmuar emrin e tij në stol. 41-vjecari ka firmosur për 3 sezone, ndërsa ndër objektivat kryesorë është fitimi i titullit kampion. Ende pa marrë mirë detyrën, Motta ka bërë të qartë dhe emrat e dëshiruar në ekip, ku mes tyre janë dhe dyshja Douglas Luiz-Mason Greenwood. Ekseperienca nuk është pika e tij më e fortë, pasi karrierën si trajner e nisi në 2018-ën me 19-vjeçarët e PSG për të vijuar më tej tek Genoa.

Sa i përket Fonsecas, ai është një emër i njohur i trajningut, pasi më herët ka drejtuar dhe Romën në Itali. Pjesën më të madhe të karrierës e ka kaluar në Portugali, por ka provuar të drejtojë dhe në Francë e Ukrainë. Kalimi tek Milan shihet si një hap i madh, ku 51-vjeçari do të provojë të tregojë veten.