Ministrat e Mbrojtjes së BE diskutojnë për mbështetjen për armatosjen e Ukrainës

Vazhdimi i armatosjes së Ukrainës nga Perëndimi është çështja që po dominon takimin e ministrave të Mbrojtjes të BE-së në Suedi.

Ata po shqyrtojnë plane se si të furnizojnë Kievin me municione me vlerë miliarda euro nga stoqet përkatëse dhe se si të bashkojnë forcat për më shumë. Komisioni Evropian po nxit palët për një vendim të shpejtë.

“Çështja është se si të sigurojmë municionet e duhura që Ukraina të vazhdojë vetëmbrojtjen. Prezantova propozimin që ministrat do të diskutojnë. Ai është hartuar bashkë me Agjencinë Evropiane të Mbrojtjes, të cilën kam nderin ta drejtoj dhe Komisionin”, u shpreh Josep Borrell, Përfaqësues i Lartë për Punët e Jashtme.

Veçmas takimit, ministri ukrainas i Mbrojtjes mohoi që vendi i tij të ishte përfshirë në sabotimin e gazsjellësit “Rrjedha e Veriut”.

“Për mua, kjo është një histori e çuditshme pasi nuk ka asnjë lidhje me ne. Mendoj se hetimi i autoriteteve zyrtare do të zbardhë çdo detaj. Në rast të kundërt do të ishte një kompliment për forcat tona speciale, por nuk e kemi bërë ne”, theksoi Oleksii Reznikov, ministër i Mbrojtjes së Ukrainës.

Zyrtarët e BE-së shpresojnë të firmosin një plan për furnizimin e përbashkët të Ukrainës, që të mund të miratohet përpara takimit të ministrave të Jashtëm, më 20 mars.