Ministria për Evropën dhe Punët e Jashtme reagon për Raportin e Progresit 2025

Ministria për Evropën dhe Punët e Jashtme ka reaguar këtë të martë pas publikimit të Raportit të Progresit 2025 nga Komisioni Europian, duke e cilësuar atë si një vlerësim historik për ecurinë e Shqipërisë në rrugën e integrimit europian.

Në njoftimin zyrtar, Ministria thekson se “Raporti evidenton përparimin e qëndrueshëm të vendit tonë në reformat kyçe, shënon arritjet konkrete dhe rithekson përkushtimin e palëkundur të Qeverisë dhe të Shqipërisë ndaj standardeve europiane.”

Sipas reagimit, Komisioni Europian “përshëndet angazhimin e fortë politik të Shqipërisë në rrugën e integrimit europian”, duke vlerësuar përparimin e rëndësishëm në reformën e drejtësisë, si dhe rezultatet “domethënëse të arritura në luftën kundër korrupsionit dhe krimit të organizuar.”

Në raport nënvizohet gjithashtu ritmi i lartë i negociatave për anëtarësim, që prej tetorit të vitit 2024: “Ecuria e tyre me një ritëm ‘të paprecedentë’ ka çuar në hapjen e 28 kapitujve brenda një viti,” ndërsa pritet që pesë kapitujt e mbetur të hapen deri në fund të këtij viti.

Ministria thekson se për të dytin vit radhazi, Komisioni Europian “ripohoi mbështetjen për objektivin e Shqipërisë për përmbylljen e negociatave deri në vitin 2027, në një proces plotësisht të bazuar në meritë.”

Në reagim nënvizohet se “Raporti i Progresit për vitin 2025 është dokumenti më pozitiv i publikuar ndonjëherë për marrëdhëniet mes Shqipërisë dhe Bashkimit Europian,” duke reflektuar punën e madhe të bërë nga ekipi negociator dhe bashkëpunimin e shkëlqyer me institucionet e BE-së.

Në përfundim, Ministria për Evropën dhe Punët e Jashtme thekson se gjetjet e raportit përbëjnë “një moment të rëndësishëm reflektimi, për të vlerësuar rrugën e deritanishme dhe për të forcuar përgjegjësinë për të vijuar përpara me fokus, vendosmëri dhe rezultate konkrete.”

“Integrimi në BE mbetet udhërrëfyesi ynë strategjik për forcimin e demokracisë, zhvillimit dhe mirëqenies së qytetarëve shqiptarë në dobi të një të ardhmeje të përbashkët europiane,” përmbyllet reagimi i Ministrisë.