Ministrja Ibrahimaj tregon pse Bordi i Transparencës do vijojë të funksionojë

Ministrja e Financave dhe Ekonomisë, Delina Ibrahimaj thotë se Bordi i Transparencës ka zbatuar aktin normativ që parashikon formulën e llogaritjes së çmimit të karburantit në çdo rast.

Në një konferencë për mediat të hënën, Ibrahimaj u shpreh se marzhet e fitimit të kompanive të hidrokarbureve janë ndjeshëm më të ulëta se ato të një viti më parë, dhe kjo është e bazuar në shifra.

“Çdo rast çmimi ndryshon në bazë të çmimit të bursës për një produkt të rafinuar të naftës jo bruto. Kam bindjen e bazuar në shifra se marzhet e fitimit të kompanive të hidrokarbureve janë ndjeshëm më të ulëta se ato të një viti më parë. Që do të thotë, që për sa kohë çmimet do të jenë ndjeshëm mbi mesataren, do të vazhdojmë të mbajmë këtë praktikë, edhe pse nuk duam të ndërhyjmë në çmimet  e tregut”, u shpreh ministrja.

Një muaj më parë, Partia Demokratike ka depozituar në Gjykatën Kushtetuese kërkesën për të shfuqizuar bordin e ngritur nga qeveria për përcaktimin e çmimeve të karburanteve.

LEXONI GJITHASHTU:

• PD depoziton në Gjykatën Kushtetuese kërkesën për shfuqizimin e Bordit të Ushqimeve
• Ulet çmimi i naftës, vendos Bordi i Transparencës