Mjeku kardiolog: Korrupsioni në shëndetësi ekziston, këtë e dinë të gjithë

Gjykata e Posaçme caktoi këtë të shtunë masën e sigurisë “arrest me burg” për kardiokirurgun e QSUT, Edvin Prifti pas kërkesës së Prokurorisë që e akuzon për pastrim parash.

Mjeku para gjykatës i mohoi akuzat e ngritura pasi emri i tij doli në përgjimet e kryera në rastin e gjyqtares Enkeleda Hoxha, e cila u vu në pranga dy ditë më parë.

Kardiologu Petrit Vargu tha se fenomeni i korrupsionit në sektorin e shëndetësisë është prezent dhe këtë kanë dijeni shumica e qytetarëve.

Pavarësisht kësaj, mjeku Vargu shprehet në Euronews Albania se komentet që kryeministri Edi Rama i bëri për çështjen e mjekut të arrestuar para se të jepej masa nga GJKKO-ja janë veprime të papranueshme për një shtet demokratik.

“Unë rastin e Priftit nuk e di, aq më tepër që ka kohë që mungoj në spital, por unë do të them këtë që: korrupsion në shëndetësi ka dhe kjo dihet dhe këtë e di i gjithë populli. Këtë e kam denoncuar disa herë”, tha ai.

“Unë mendoj se korrupsioni më i madh ekziston tek institucionet që e drejtojnë”, tha ai.