Zbardhen detaje të reja sa i takon operacionit të SPAK, ku nën akuzë u vendos avokati Bardh Koçi.
Sipas SPAK, Koçi është personi që ka kërkuar dhe marrë një shumë prej 1000 eurosh për të ndikuar në vendimmarrjen e gjyqtarëve në një çështje të lidhur me klienten e tij, Pranvera Meshi.
Përmes përgjimeve telefonike dhe vëzhgimeve, SPAK ka zbuluar komunikimin mes avokatit dhe klientes, ku ai ka kërkuar paratë për të ndikuar në vendimmarrjen e organeve të drejtësisë.
Pas zhvillimit të një seance gjyqësore, Koçi ka kërkuar shumën e parave, të cilat janë dërguar nga Meshi përmes sistemit Ëestern Union.
Por të dhënat e përftuara nga përgjimet telefonike, ambientale apo vëzhgimet e kryera nga policia gjyqësore, nuk provojnë që ai të ketë komunikuar me funksionarët e drejtësisë para zhvillimit të seancës.
Megjithëse ushtrimi i ndikimit tek funksionarët nuk rezulton të jetë kryer, sipas SPAK avokati ka konsumuar kështu elementë të veprës penale “Ushtrimi i ndikimit të paligjshëm”.
Në orën 14:30, Bardh Koçi do të njihet me masën e sigurisë “arrest shtëpie”. Ai kërkon nga gjykata një masë më të butë duke marrë parasysh rrethanat shëndetësore të gruas së tij.
