Policia e Tiranës ka arrestuar një 40-vjeçar, i cili ishte në kërkim për veprat penale “Heqja e paligjshme e lirisë” dhe “Shtrëngimi me anë të kanosjes ose dhunës për dhënie pasurie”.
I dyshuari, në bashkëpunim me shtatë persona të tjerë, akuzohet se në korrik të vitit 2024 ka rrëmbyer dhe kanosur një 35-vjeçar për përfitime financiare. Në momentin e ndalimit, ai ka tentuar të mashtrojë policinë duke dhënë gjeneralitete të rreme.
Operacioni për kapjen e tij është kryer nga specialistët e Sektorit për Hetimin e Krimeve të Rënda, në bashkëpunim me Forcën e Posaçme “Shqiponja”, bazuar në informacione të siguruara nga inteligjenca informative.
Shtetasi F. K., 40 vjeç, banues në Tiranë, ishte shpallur në kërkim pas vendimit të Gjykatës së Tiranës, e cila i kishte caktuar masën e sigurisë “Arrest në burg”.
Në kuadër të operacionit “The Debt”, që u zhvillua në korrik 2024, policia kishte ekzekutuar masat e sigurisë për shtatë bashkëpunëtorët e tij: katër prej tyre u arrestuan, ndërsa tre të tjerë u vendosën në “arrest shtëpie”.
Materialet procedurale i kaluan Prokurorisë për veprime të mëtejshme.
