Moska sulme me dronë drejt Ukrainës, regjistrohen disa viktima! Reagon Kievi

Dy gra janë vrarë dhe një burrë është plagosur si pasojë e bombardimeve ruse në Nikopol, në jug të Ukrainës.

Më herët, Kievi zyrtar deklaroi se kishte përjetuar një tjetër natë sulmesh nga Rusia, me 35 dronë iranianë të tipit “Shahed”, 34 prej të cilëve ishin rrëzuar.

Autoritetet ukrainase deklaruan se një zjarr ra në një magazinë në rrethinat e Kievit si pasojë e sulmeve, por për fat të mirë nuk pati viktima.

Rusia ka sulmuar vazhdimisht rajone të shtumta të Ukrainës në ditët e fundit. Në anën tjetër, zyrtarë ushtarakë të Moskës bënë me dije se sistemet e mbrojtjes ajrore kishin rrëzuar një dron ukrainas që po fluturonte mbi rajonin e Brianskut, në kufirin mes Bjellorusisë dhe Ukrainës.

Ndërkohë, në terren, Ukraina ka nisur ndërtimin e fortifikimeve të reja për të frenuar valën e sulmeve ruse përgjatë vijës së frontit.

Së fundmi, Ukraina ka marrë një rol mbrojtës në konflikt, pasi kundërofensiva e nisur në verë dështoi të arrinte rezultatet e shpresuara.

Të enjten, shefi i shtabit të përgjithshëm rus, Valeri Gerasimov, pranoi avancimin e vogël të një njësie armike në frontin jugor, por pa përçarë vijat mbrojtëse ruse.

LEXONI GJITHASHTU:

• Ukraina në udhëkryq, Senati i SHBA pranë marrëveshjes për lëvrimin e ndihmës
• “Jemi në prag lufte civile”- Kandidati i Vuçiç: Beogradi para skenarit ukrainas