Nafta bie pas disa sinjaleve për ulje tensionesh në Lindjen e Mesme

Çmimet e naftës shënuan rënie të hënën, pasi tregjet reaguan ndaj sinjaleve për lehtësim të tensioneve në Lindjen e Mesme pas deklaratave të presidentit amerikan Donald Trump lidhur me situatën në Liban.

Kontratat e ardhshme të naftës Brent, të cilat më herët kishin kaluar nivelin e 97 dollarëve për fuçi, ranë nën 95 dollarë, ndërsa nafta amerikane West Texas Intermediate (WTI) zbriti në rreth 91.9 dollarë për fuçi.

Lëvizja në tregje erdhi pasi Trump deklaroi se kishte zhvilluar kontakte me palët e përfshira në konflikt dhe se ishte arritur një mirëkuptim për ndalimin e shkëmbimeve të zjarrit mes Izraelit dhe Hezbollahut. Ai tha gjithashtu se kryeministri izraelit Benjamin Netanyahu kishte rënë dakord të mos dërgonte trupa në Bejrut.

Ndërkohë, Organizata e Inteligjencës e Korpusit të Gardës Revolucionare Islamike (IRGC) deklaroi se çdo shkelje e asaj që e konsideron “vijë të kuqe” në Liban dhe Gaza do të shihej si një kërcënim i drejtpërdrejtë ndaj sigurisë kombëtare të Iranit dhe aleatëve të tij në rajon.

Në një zhvillim tjetër, Irani pezulloi shkëmbimet indirekte të mesazheve me Shtetet e Bashkuara përmes ndërmjetësve, duke e cilësuar vendimin si protestë ndaj operacioneve të vazhdueshme ushtarake izraelite në Liban.

Megjithatë, deklaratat për mundësinë e ndalimit të përshkallëzimit ushtarak duket se kanë qetësuar përkohësisht tregjet energjetike, duke ulur shqetësimet për ndërprerje të furnizimeve me naftë nga rajoni.