Nata e çmimeve Oscar, qytetarët e Hong-Kongut peticion kundër prezantuesit aziatik

Disa dhjetëra mijëra persona kanë nënshkruar një peticion për të hequr aktorin nga Hong- Kongu, Donnie Yen, nga prezantimi i natës së çmimeve Oscar për shkak të mbështetjes që ka shprehur për qeverinë kineze.

Peticioni online u organizua nga një grup aktivistësh nga Hong-Kongu. Në të thuhet se deklaratat e aktorit lidhur me protestat e vitit 2019 në Hong Kong shkelnin shpirtin e lirisë së shprehjes.

Akademia e Filmit, Artit dhe Shkencës, votuesit e të cilit përcaktojnë se kujt do t’i shkojnë çmimet Oscar, nuk e ka komentuar ende peticionin.

Donnie Yen është një yll i njohur ndërkombëtarisht i filmave aksion, që së fundmi shkaktoi polemika pasi i cilësoi protestat e 4 viteve më parë një kryengritje.

59-vjeçari është i njohur për filmat ku portretizon mjeshtrin e arteve marciale Ip Man, që në mbarë botën ka siguruar mbi 400 milionë dollarë.

Së shpejti ai do të shfaqet përkrah aktorit të mirënjohur amerikan Keanu Reevs, në episodin e katër të sagës së vrasësit John Wick.

Peticioni thotë se ftesa e akademisë për Yen tregon përbuzje ndaj popullit të Hong Kongut dhe se prania e tij do të dëmtonte imazhin dhe reputacionin e industrisë kinematografike.

Deri tani ai është nënshkruar nga mbi 84 mijë firma.

LEXONI GJITHASHTU:

• Presidentja e Oscar e pranon: “Shuplaka” nuk u ndëshkua mjaftueshëm
• OSCARS 2023, filmi gjerman mbi luftën thyen rekord me 8 nominime