NATO nën presion për të ndalur blerjen e naftës ruse

Presidenti amerikan Donald Trump deklaroi të shtunën se Shtetet e Bashkuara janë të gatshme të vendosin sanksione të reja energjetike ndaj Rusisë, por vetëm nëse të gjitha vendet e NATO-s ndalojnë blerjen e naftës ruse dhe zbatojnë masa të ngjashme.

“Jam gati të vendos sanksione të mëdha ndaj Rusisë kur të gjitha vendet e NATO-s të kenë rënë dakord dhe të kenë filluar të bëjnë të njëjtën gjë dhe kur të gjitha vendet e NATO-s të ndalojnë së bleri naftë nga Rusia,” shkroi ai në një postim në rrjetet sociale.

Në javët e fundit, Uashingtoni ka shtuar presionin ndaj aleatëve për të forcuar sanksionet energjetike ndaj Moskës, me synimin për të mbyllur burimet financiare të luftës në Ukrainë. Megjithatë, Trump përballet me kritika të brendshme, pasi afatet e përsëritura dy-javore që ai ka vendosur për Rusinë nuk janë shoqëruar me veprime konkrete. Një sondazh i fundit i Reuters/Ipsos tregon se 54% e amerikanëve e shohin atë si shumë të afërt me Moskën, përfshirë një në pesë votues republikanë.

Nga ana tjetër, Bashkimi Evropian ka bërë të ditur se do të vazhdojë të bashkëpunojë me partnerët globalë në kuadër të sanksioneve ndaj Rusisë, por gjithnjë në përputhje me rregullat e veta dhe pa zbatim ekstraterritorial. Ndërkohë, ministrat e financave të vendeve të G7 kanë diskutuar për masa shtesë kundër Moskës, përfshirë tarifa ndaj shteteve që konsiderohen mbështetëse të luftës së saj në Ukrainë.

Eksportet e naftës dhe gazit mbeten burimi kryesor i të ardhurave të Rusisë, çka i bën ato një objektiv kryesor të sanksioneve perëndimore. Por ekspertët paralajmërojnë se masa më të ashpra ndaj naftës ruse mund të rrisin ndjeshëm çmimet globale të energjisë, duke krijuar pasoja negative për ekonomitë perëndimore dhe duke dobësuar mbështetjen publike për sanksionet.

Sipas Qendrës për Kërkime mbi Energjinë dhe Ajrin e Pastër (CREA), disa vende anëtare të NATO-s vazhdojnë të importojnë naftë ruse. Turqia është blerësi i tretë më i madh globalisht pas Kinës dhe Indisë, ndërsa Hungaria dhe Sllovakia gjithashtu vijojnë furnizimet nga Moska.

Në këtë kontekst, administrata Trump ka vendosur një tarifë shtesë prej 25% ndaj importeve nga India, me qëllim frenimin e blerjeve të saj të naftës së lirë ruse, duke çuar tarifat totale në 50% dhe duke tensionuar marrëdhëniet tregtare me Nju Delhin. Ndërkohë, Kina nuk është përballur me masa të ngjashme, për shkak të ekuilibrave të ndjeshëm tregtarë mes SHBA-së dhe Pekinit. Trump ka sugjeruar që NATO, si bllok, të vendosë tarifa prej 50 deri në 100% ndaj importeve kineze, me synimin për të dobësuar ndikimin ekonomik të Kinës në mbështetjen e Moskës.

LEXONI GJITHASHTU:

• Trump intensifikon retorikën kundër të majtës radikale pas vrasjes së Charlie Kirk
• Trump letër vendeve të NATO-s: Gati për sanksione të mëdha ndaj Rusisë