NATO nuk po bën asgjë për të ndalur Rusinë, thotë ministri i Jashtëm ukrainas

Ministri i Jashtëm i Ukrainës, Dmytro Kuleba ka akuzuar NATO-n se nuk po bën asgjë për të ndalur Rusinë.

Në Forumin Ekonomik të Davosit, Kuleba tha se Rusia po e anashkalon NATO-n si aleancë dhe institucion, shkruan The Guardian.

“NATO si aleancë, si institucion, është krejtësisht e anashkaluar dhe nuk bën asgjë. Më vjen keq ta them”, u shpreh ai.

Kuleba vlerësoi BE-në për vendimet e saj “revolucionare” për të mbështetur Kievin, por tha se aleanca ushtarake e NATO-s nuk po vepron për të ndalur agresionin rus.

Pretendimi i Ukrainës për t’u anëtarësuar në NATO, ishte një prej arsyeve kryesore përse Rusia filloi agresionin e saj më 24 shkurt.

Moska është kundër anëtarësimit të Ukrainës në NATO dhe kërkon që Kievi të mbajë statusin e vendit neutral.

Aleanca Euroatlantike po përballet me probleme të brendshme në mes të procesit të pranimit të Suedisë dhe Finlandës. Pas bisedimeve të para në Ankara me delegacione nga të dy vendet nordike, Turqia ende refuzon të zhbllokojë procedurat  derisa të adresohen shqetësimet e saj të sigurisë.

LEXONI GJITHASHTU

• ‘Ukraina të lëshojë territor’, Zelenski reagon ndaj ish-sekretarit amerikan
• Zelenski: Situata në Donbas e vështirë, rusët duan të shkatërrojnë gjithçka