NATO po i merr seriozisht kërcënimet bërthamore të Rusisë dhe çdo përdorim i tyre nga Kremlini do të ketë pasoja serioze.

Ky ishte mesazhi kryesor që sekretari i përgjithshëm i Aleancës përcolli të enjten, pas një takimi të ministrave të Mbrojtjes të vendeve anëtare në Bruksel.

Gjithashtu, Jens Stoltenberg cilësoi si të papërgjegjshme deklaratat e presidentit Putin.

“Rrethanat në të cilat NATO mund të përdorë armë bërthamore janë shumë të largëta. Retorika bërthamore e Rusisë është e rrezikshme, e papërgjegjshme dhe ata e dinë se çdo përdorim i këtyre armëve ndaj Ukrainës do të ketë pasoja serioze. Ata e dinë që një konflikt bërthamor nuk duhet të ndodhë”, tha Jens Stoltenberg, sekretar i përgjithshëm i NATO-s.

Numri një i Aleancës shtoi se për momentin Moska nuk duket se po bën gati arsenalin e saj bërthamor.

Ndërkohë, ministrja gjermane e Mbrojtjes deklaroi se 15 vende të BE-së, përfshirë Belgjikën dhe Britaninë, kanë rënë dakord për një sistem modern mbrojtjeje ajrore.

Nën koordinimin e Gjermanisë u nënshkrua një dokument për organizimin e përbashkët të të ashtuquajturit “Mburoja e Qiellit Evropian”.

“Ne duam të ndërtojmë një projekt të përbashkët për mbrojtjen ajrore dhe duke nënshkruar sot Memorandumin e Mirëkuptimit, ne po i japim jetë kësaj nisme dhe po ndajmë përgjegjësinë për sigurinë e kontinentit tonë”,  u shpreh Christine Lambrecht.

Në fund të gushtit, kancelari Olaf Scholz deklaroi se Gjermania planifikon të investojë gjerësisht në mbrojtjen ajrore në vitet e ardhshme dhe se sistemi do të jetë i hapur për aleatët.

LEXONI GJITHASHTU:

• Paralajmërimi i zyrtarit rus: Do ketë Luftë të III Botërore nëse Ukraina hyn në NATO
• Rusia shtet terrorist, Këshilli i Evropës kërkon ngritjen e gjykatës për krime lufte