Ndalohen tre persona të huaj në Shkodër, dyshohet se përhapnin ideologji tek fëmijët

Burime konfidenciale policore bëjnë të ditur se pasditen e djeshme dhe gjatë natës, Policia e Shkodrës ka ndaluar tre shtetas të huaj, dy meshkuj dhe një grua me origjinë nga Lindja e Mesme.

Ndalimi i tyre është bërë pas një kërkese nga zyra e antiterrorit e Drejtorisë së Policisë Tiranë. Tre të ndaluarit menjëherë janë dërguar në Tiranë në cilësinë e personave të shoqëruar, ku po merren në pyetje për aktivitetin e tyre në vendin tonë.

Mësohet se zyra e antiterrorit në Drejtorinë e Përgjithshme të Policisë së Shtetit dhe zyra antiterroriste e Shërbimit Informativ Kombëtar kanë kërkuar drejtorive të policive në qarqe shoqërimin e disa personave në gjithë Shqipërinë, të cilët do të merren në pyetje për aktivitetin e tyre në vendin tonë.

Këto verifikime vijnë pak ditë pasi në media u publikuan pamje të disa personave të dyshimtë të mbuluar, që tentonin të afroheshin pranë fëmijëve.

Burime nga policia bëjnë të ditur se nga hetimet paraprake dyshohet se personat në fjalë tentojnë të përhapin ideologji të caktuara tek fëmijët.