Ndeshja me Anglinë, Asllani: Te Interi tallen, thonë se Shqipëria do pësojë 6-7 gola

Kombëtarja e Shqipërisë ka zhvilluar stërvitjen e radhës të martën, përpara dy ndeshjeve kyçe të Grupit K në eliminatoret për Kupën e Botës 2026.

Ditën e premte, do të jetë ndeshja në Angli, ndërsa tre ditë pas saj, do të presim Andorrën në Tiranë, një duel që pritet të jetë po aq i rëndësishëm.

Pas kësaj seance stërvitore, ishin mesfushorët Kristjan Asllani dhe Nedim Bajrami të cilët dolën në një bashkëbisedim me gazetarët në prag të këtyre dy sfidave.

Asllani: Anglia është një kundërshtar i fortë, por ne do të luajmë me shpirt dhe zemër
Kristjan Asllani theksoi se Shqipëria do të luajë me të gjitha forcat për të nisiur mirë fushatën eliminatore. Ai u shpreh se ndeshja kundër Anglisë do të jetë e vështirë, pasi Anglia ka një skuadër shumë të fortë, por ishte i bindur që Shqipëria mund të bëjë një paraqitje të fortë. Ai tha se nuk do të shkojnë në Londër si turistë dhe do të japin maksimumin për të arritur një rezultat pozitiv.

Më pas, ai u pyet nga gazetarët nëse ka diskutuar me shokët te Interi për këtë takim. “Kemi folur, janë tallur të gjithë. Më kanë thënë do të merrni 6-7 gola dhe do të ikni në shtëpi”, tha Asllani.

Bajrami: Anglia luan futboll fizik, por ne do të përgatitemi për këtë stil
Nedim Bajrami, që luan te Rangers në Skoci, është mësuar me futbollin fizik në ishull dhe pret që Anglia të luajë me një stil të ngjashëm.

“Te Rangers kam gjashtë muaj të mira, këtë kohë nuk kam marrë shumë minuta, por jam i gatshëm. Unë luaj në krah dhe në mesin e fushës, ku të dojë Sylvinho unë jam gati për të dhënë më të mirën”, tha Bajrami.

Ai tha se Kombëtarja është gati për këtë sfidë dhe se afrimi i Brojës ka kompletuar skuadrën. Bajrami theksoi se humbja e 5-0 katër vjet më parë i ka mësuar shumë dhe se Shqipëria do të jetë më e përgatitur këtë herë.

Të mërkurën Kombëtarja niset drejt Anglisë ndërsa në gjashtë takimet e fundit kundër tyre kemi marrë po kaq humbje.

LEXONI GJITHASHTU:

• “Nuk trembemi”- Bajrami e Asllani në konferencë: Nuk shkojmë si turistë në Angli
• Champions League – Asllani shkëlqen në fitoren e Interit, triumfojnë të mëdhatë