“Në Korçë PD kap 5 mandate”, Salianji: Gjakosja në Vashtëmi, provokim i socialistëve

Kandidati për deputet i Partisë Demokratike, Ervin Salianji, tha se deri tani numërimi ka treguar që në qarkun e Korçës, PD dhe koalicioni opozitar bashkë me Lëvizjen Socialiste për Integrim janë rreth 2000 vota para Partisë Socialiste.

Ai u shpreh se në Korçë do të marrin 6 mandate nga ku 5 të Partisë Demokratike.

“Kutitë e hapura deri tani në qytetin e Korçës janë qendra votimi që tradicionalisht kanë votuar për Partinë Socialiste dhe në zgjedhjet e kaluara ka pasur një avantazh më të madh PS-ja dhe këtë herë kemi ne një rritje ndërkohë që Partia Socialiste ka një rënie të numrit të votuesve,” – u shpreh Salianji.

Ai shprehu bindjen se pasi të numërohen të gjitha kutitë dhe të lexohet gjithë vullneti i qytetarëve, PD-ja do të jetë forca fituese.

Sa i takon incidentit të ndodhur dje në fshatin Vashtëmi në Maliq, ku një Komisioner i Partisë Demokratike ka goditur me karrige dy simpatizantë të Partisë Socialiste, Salianji u shpreh se fushata e PD-së ka qenë pozitive dhe një fushatë që prezantonte ide dhe programe të qarta.

“Të gjithë pjesën e tensionimit që bënte Partia Socialiste dje e kemi adresuar në organet ligjzbatuese të cilat kanë reaguar me vonesë dhe besoj do të merremi dhe në të ardhmen, nga nesër e mbrapa. Sot do të merremi me numërimin e votave dhe me kontrollin e çdo vote nga qytetarët,” – u shpreh kandidati për deputet i PD-së duke theksuar se incidenti i djeshëm ka qenë i frymëzuar nga PS.