“Në lojë është liria”, Biden me krerët e NATO-s: Konflikti në Ukrainë, jo i izoluar

Presidenti amerikan, Joe Biden drejtoi të mërkurën, në ditën e dytë të vizitës në Varshavë, një samit me përfaqësuesit e vendeve anëtare të NATO-s, pjesë e grupimit të njohur si “Bukureshti 9”.

Gjatë takimit, Biden riafirmoi angazhimin ndaj nenit “të shenjtë” për mbrojtjen e vendeve anëtare të Aleancës dhe paralajmëroi se në luftën me Rusinë nuk është në lojë vetëm e ardhmja e Ukrainës.

“Ju jeni në vijën e frontit të mbrojtjes sonë kolektive dhe ju e dini më mirë se kushdo tjetër se çfarë është në lojë në këtë konflikt. Këtu nuk bëhet fjalë vetëm për Ukrainën, por për lirinë dhe demokracinë në Evropë dhe mbarë botën”, deklaroi Biden.

Më tej, duke komentuar tërheqjen e Rusisë nga traktati i ri për armatimet strategjike, NEW START, Biden tha se presidenti Putin bëri një “gabim të rëndë”.

Në grupimin “Bukureshti 9” bëjnë pjesë Letonia, Lituania, Estonia, Polonia, Republika Çeke, Sllovakia, Hungaria, Rumania dhe Bullgaria.