‘Në SHBA nuk ka vend për urrejtje’, Biden dënon vrasjen e katër myslimanëve

Presidenti Joe Biden reagoi dhe dënoi vrasjet e katër myslimanëve në shtetin e Nju Meksikos, vrasje të cilat sipas policisë mund të jenë një krim urrejtjeje dhe mund të kenë lidhje mes tyre.

Reagimi erdhi pas ngjarjes së 1 gushtit ku në qytetin Albuquerque, u vra një djalë i ri, pjesë e komunitetit musliman.

“Jam i zemëruar dhe i pikëlluar nga vrasjet e tmerrshme të katër burrave myslimanë në Albuquerque. Ndërsa presim një hetim të plotë, lutjet e mia janë me familjet e viktimave dhe administrata ime mbështet fuqishëm komunitetin mysliman. Këto sulme urrejtjeje nuk kanë vend në Amerikë”, u shpreh i Kreu i Shtëpisë së Bardhë, në një postim në rrjetin social Twitter.

Sipas Albuquerque Journal, 27-vjeçari Muhammed Afzaal Hussain u qëllua dhe u vra më 1 gusht, ndërsa 41-vjeçari Aftab Hussein u vra më 26 korrik. Të dy ishin nga Pakistani dhe anëtarë të së njëjtës xhami.

Autoritetet bënë me dije se po punojnë për të përcaktuar nëse vrasjet e katër shtetasve muslimanë të ndodhura në nëntë muajt e fundit, kanë lidhje mes tyre.

Ndërsa autoritetet përsëritën kërkesën që të gjithë ata që kanë informacion për vrasjet të kontaktojnë policinë, u raportua se masat e sigurisë u shtuan në zona të caktuara të  qytetit ku banon komuniteti mysliman.

Këshilli për Marrëdhëniet Amerikano-Islamike (CAIR), Organizata më e madhe e të Drejtave Civile myslimane në vend, rriti shpërblimin në 10,000 nga 5,000 dollarë për informacionin që çon tek i dyshuari ose të dyshuarit që lidhet me vrasjet.

Policia konfirmoi se personi ose personat që vranë shtetasit muslimanët në nëntë muajt e fundit ,mund të jenë i njëjti individ ose individë.

LEXONI GJITHASHTU

• Pas 3 ditësh luftime, hyn në fuqi armëpushimi mes Izraelit dhe Palestinës
• Izraeli vret liderin e dytë islamik palestinez gjatë bombardimeve në Gaza