Negociatat Liban-Izrael, kryeministri Salam: Është shumë herët për të folur për një takim me Netanyahun

Kryeministri libanez, Nawaf Salam ka deklaruar këtë të mërkurë se është shumë herët për të folur për një takim të mundshëm me kryeministrin izraelit, Benjamin Netanyahu ndërsa të dy vendet vazhdojnë negociatat për t’i dhënë fund sulmeve të Izraelit.

Ai shtoi se Libani kërkon paqe me Izraelin, jo normalizim, raportoi Agjencia Kombëtare e Lajmeve e Libanit (NNA). Sipas tij, çdo takim i nivelit të lartë me palën izraelite do të kërkonte shumë përgatitje.

Të hënën, presidenca libaneze tha se priten bisedime përgatitore përpara raundit të ardhshëm të negociatave Liban-Izrael në Uashington, por nuk specifikoi se kur mund të zhvillohen të dyja.

Salam tha të mërkurën se konsolidimi i armëpushimit të paqëndrueshëm në vend do të jetë baza e raundit të ardhshëm të negociatave.

“Libani do të kërkojë një afat kohor për tërheqjen e Izraelit dhe do të zhvillojë një plan për të kufizuar armët ekskluzivisht në institucionet shtetërore”, tha ai, duke iu referuar demilitarizimit të Hezbollahut.