Temperaturat deri në 48 gradë Celsius, cili vend është përfshirë nga vapa ekstreme

Një valë e fortë të nxehti ka përfshirë Uzbekistanin, duke detyruar autoritetet të marrin masa urgjente për mbrojtjen e qytetarëve, pasi temperaturat kanë arritur deri në 48 gradë Celsius në disa rajone të vendit.

Në pjesën më të madhe të Uzbekistanit temperaturat janë luhatur mes 42 dhe 45 gradë Celsius, ndërsa në rajonet jugore dhe zonat shkretinore kanë arritur 46-48 gradë, duke ushtruar presion mbi shërbimet publike dhe duke detyruar banorët të ndryshojnë rutinën e përditshme.

Autoritetet kanë angazhuar ekipet e zjarrfikësve dhe të shpëtimit në shërbim 24 orë në ditë pranë tregjeve, qendrave tregtare dhe vendeve të frekuentuara, për të parandaluar zjarret dhe për t’iu përgjigjur çdo emergjence.

Për të lehtësuar pasojat e vapës, ekipet e emergjencës kanë përdorur automjete zjarrfikëse për të spërkatur me ujë fëmijët në lagjet e banuara gjatë orëve më të nxehta të ditës.

Zyrtarët e Ministrisë së Situatave të Emergjencave thanë se aktiviteti synon jo vetëm t’i freskojë fëmijët, por edhe t’u ngrejë moralin gjatë ditëve me temperatura ekstreme.

Ndërkohë, ministria ka intensifikuar fushatat e ndërgjegjësimit, duke u bërë thirrje qytetarëve të ndjekin rekomandimet për t’u mbrojtur nga i nxehti dhe pasojat që ai mund të shkaktojë.